耳機製造商富士高（927）噚日派中期成績表，截至9月底止6個月，純利暴跌55%，得番1003萬，基本及攤薄每股盈利2.45仙，但係仲維持派中期息每股3仙兼特別息每股1仙。睇到呢隻股嘅業績，華華好自然諗起股壇長毛DavidWebb（圖）。
猶記得前幾年，長毛好興年尾醒大家一份「聖誕禮物」，推介一隻心水靚股，當然，極度鍾意撰文嘅佢，仲會整篇嘢解釋吓咩原因揀呢隻股啦，而長毛對富士高嘅鍾愛，都可謂細水長流。話說07年嗰陣，佢已經係第三大股東，嗰年仲特登走去富士高25周年酒會度祝賀，直到家，佢仲揸住7.08%股權o架，家陣睇住隻愛股越嚟越走樣，噚日股價仲因為業績差而應聲跌7.2%……長毛仲繼續對佢心不變？
李華華