審計風暴引發全城鬧爆教育局，局長孫明揚雖然不是直資學校計劃的倡導者，但任內未有加強與直資學校溝通，去年爆發臻美事件後亦未有吸取教訓好好進行監管，有立法會議員表明孫公難辭其咎，將狙擊並要求他下台承擔責任。學界亦認為孫及教育局未有做好本份，「有人想佢下台都唔出奇」。
「好明顯係監管不力」
立法會教育界議員張文光表示，部份直資學校管理出現問題，孫明揚責無旁貸，因為直資學校受教育局監督，「冇理由教育局每一年都去審視直資學校行政同財政時，冇發現呢啲問題存在，要等審計署出報告先至一次過點晒出嚟」，直斥「呢個好明顯係監管不力，係教育局失職」。
張文光力促教育局亡羊補牢，從速向有問題的直資學校展開調查，糾正現有錯誤和漏洞。
張續指從審計報告發現部份直資學校向政府申請撥款，卻未有簽署接受監督的協議，認為日後必須杜絕有關情況，強制所有直資學校需要接受政府監管。
民主黨涂謹申也指孫明揚要在今次事件負上最大責任，「呢單嘢如果再處理得差，孫明揚可以提早落台，因為佢主力負責嘅嘢得（教育）一瓣，但今次竟然做得咁差」。
社民連黃毓民亦表明會在立法會教育事務委員會「追殺」孫明揚，不排除要求孫公提早下台，「佢根本係老奸巨猾，滑不溜手，佢根本就係唔想做，只顧住食長俸，每個月成卅幾萬」。
有直資學校校長認為，孫明揚未有吸取去年臻美事件的教訓，才出現今次不必要的「直資風暴」，「雖然話佢唔係始作俑者，但係你睇番上年臻美出事嗰陣，好多問題同家學校出事嘅好似，好似冇簽合約、賬目混亂呢啲，如果你孫公同教育局嗰時做嘢，睇吓全港直資學校提出改善方法，就唔使等審計署出手，所以佢冇可能獨善其身，下台都唔出奇」。
教評會副主席何漢權認為，今次事件直資學校及教育局同樣有責任，「如果審計喺臻美事件之後先做，咁孫明揚真係好大責任，點解你唔喺當時乘勢整頓直資學校問題，搞成今日咁嘅局面？」
本報記者