澳門氹仔，地方其實並不氹仔，內裏潛藏的美食非常多，中菜、葡菜、西餐至地道茶餐廳都有，就連食大閘蟹都要去到澳門，真係有資格挑戰香港美食天堂的美譽。
記者、攝影：蕭漢祥
Model:Christina@StarzPeople
鳴謝：澳門威尼斯人度假村
鋪滿一隻蟹的膏
11月底，是食大閘蟹最後衝刺的時段。不過最後不代表最差，反而是最佳時段，皆因11月底天氣越冷，大閘蟹的運動量減少，蟹身肥膏越積越多，就越味美。大閘蟹在香港通街都有得食，為何要山長水遠去到澳門？原因無他，兩個字，抵食！雖然大家會覺得有甚麼可能會抵得過自家製大閘蟹宴，基本上是無錯，但我們這次去威尼斯人度假村的喜粵餐廳，吃的還有以大閘蟹製作的精心菜餚，和酒店大師傅的手工。
今次喜粵的主打，是一個每位$880的《松江晚宴》，有花雕蒸大閘蟹、蟹粉魚翅撈飯、蟹粉小籠包等共九道菜。不過，作為搵食最前線的我，反而選擇菜單後面的單點小菜，碟碟$90，其中重點推介有大閘蟹粉米卷，用米紙皮包着米粉、青瓜碎，上面放一層厚厚的大閘蟹膏和蟹子，食落味道帶點酸酸的，有點像越南米紙卷，不過最「過份」都是上面濃濃的蟹膏sauce，每件米卷上的蟹膏量，基本上已等於一隻蟹所擁有的份量，每一啖的味覺豐富且開胃，作為開飯的先頭部隊衝擊力非常強；第二道蟹粉百花金條，由炸得金黃色的蝦肉條，放上用大閘蟹膏調配的醬汁，食落脆而不油膩，金條內裏的蝦肉彈牙，混合蟹膏醬汁，非常鮮味；第三道鮮拆蟹粉肉碎粥，配料雖簡單只得蟹肉、蟹膏和米粥，但卻是當天各道菜餚之中，最美味的一道，味道融和又充滿蟹膏味、海鮮味，難怪模特兒Christinaencore再encore啦。
a.澳門威尼斯人度假村-喜粵
地址：澳門氹仔望德聖母灣大馬路
訂座電話：（853）81189930
阿飛雷蒙現身
如果大家諗住一家大細過澳門食大閘蟹享受家庭樂，這次去威尼斯人度假村就一定要參觀埋以下車展。一般車展大都係「男人樂」或「父親樂」，何以是家庭樂呢？原來這個非一般車展，展出的是動畫電影《反斗車王》入面其中兩台車的角色「芙蓉」（港譯：阿飛）和「雷蒙」。今次展覽的兩台卡通車做到與真車比例一樣，內裏還有座位有方向盤，像真度非常高，當然，睇真啲會發現並無車門，內裏亦無引擎啦。現場所見，十分鐘採訪拍攝中，已有七八個小朋友按捺不住衝入禁區，想同兩台車親一親，就連大朋友都紛紛走埋去影相，阿飛與雷蒙果然夠吸引力。另外，現正舉行迪士尼填色比賽，歡迎3-12歲小朋友參加，得獎者將獲贈前往澳門家庭旅遊套票（兩名成人及兩名小童），包括澳門威尼斯人度假村貝麗套房一晚連早餐、來回港澳的金光飛航船票及《迪士尼冰上世界奇幻之旅》A區門票。發揮小朋友創意之餘，又有機會一家大細免費去旅遊。
車展日期：即日至2011年2月14日
填色比賽：參加表格可於反斗車展場地索取，截止日期為12月17日
去骨雞翼包攞滿分!
氹仔一帶除了酒店美食，街頭美食當然從未忽略，官也街美食街自然最人氣，講地道，不少人都會去那間下午三時出爐的豬扒包店，但對於官也街一帶的街坊，問他們最愛哪間餐廳，很多都會說「文哥咖啡」。不過，此店早前無聲無息地消失了一段時間，幸好終於喺上月23號重開，但地點並非以前的位置，而是較偏僻的一角，沿木偶餐廳左行，經過坊眾幼稚園，直到盡頭轉入小巷才見到，唔係熟人指路今次都無可能搵到。
新店可容納約30人，環境光鮮，但廚房兩大台柱依舊，負責美食的榮哥及負責水吧的文哥，一入門口熟客們自然大叫：「文哥，熱啡雞翼包！」小店最強的美食係牛尾通和去骨雞翼、奶茶和咖啡，但當日牛尾湯底極速賣完，無緣品嚐。榮哥炮製了雞翼包和芝士咖喱辣魚治，去骨雞翼炸得皮脆香口，咬落啖啖肉唔怕鯁骨，再加上鬆化脆卜卜的麪包，真係非常好食。至於芝士咖喱辣魚治，辣妹Christina話不夠辣且芝士味更濃就更好。熟客謝小姐說，街坊最愛是文哥的奶茶咖啡，味道有別於坊間食店，一有空閒都會來喝咖啡兼與文哥閒談。
b.文哥咖啡
地址：澳門氹仔施督憲正街老虎巷歡樂花園地下J座
TravelMemo
持香港居民身份證毋須簽證。澳門駐港旅遊局：28388680
金光飛航來往港澳碼頭至澳門氹仔碼頭單程134港元起。金光飛航電話：23599990
1港元約兌1.02澳門幣（文中所列價錢為澳門幣）
240V，三扁腳插座
WEEKEND好旅程
澳門
明日天晴，
15-23℃
