俗話有云「有咁耐風流，就有咁耐折墮」呢句說話用喺爆出性醜聞「一周年」嘅美國高爾夫球手「老虎」活士（TigerWoods）最為合適不過。
34歲嘅活士之前一向都係「好好先生」嘅代表人物，與老婆艾蓮育有3歲女兒Sam及1歲半嘅兒子Charlie，活士更為史上首位收入超過10億美元嘅運動員。佢職業生涯共贏得14項大滿貫錦標，與紀錄保持者「金熊」尼克勞斯只差4個大滿貫冠軍。之不過美滿嘅幸福家庭，同如日中天嘅高球生涯，亦都自活士去年底爆出性醜聞後冇晒。
離婚兼身家大縮水
自去年發生「老虎乸」艾蓮追打活士導致撞車後，被傳媒踢爆艾蓮嘅追打原因，原來係同活士背妻偷食有關；及後更揭發「玩女」成性嘅活士，甚至有超過25位「虎女郎」玩伴。活士嘅「好好先生」形象破產，佢亦與艾蓮離婚，冇咗7.5億美元身家之餘，同時亦冇咗多份廣告合約，甚至佢以往喺高球場上所向無敵嘅「魔法」能力亦都冇埋，搞到自己喺2010年球季變咗「冇牙老虎」，喺今年參賽嘅13個賽事無一奪冠，生涯表現直插谷底。
成績插水失「1哥」位
所謂「衰開有條路」，34歲嘅活士喺今年嘅高球賽都創下生涯最差成績，好似8月嘅阿克朗高爾夫球邀請賽，佢喺80名球手之中排第78位，為生涯最差一次。最衰嘅係佢保持咗長達281星期嘅世界「1哥」之位，10月底亦俾英國嘅韋斯活特搶走咗，佢仲黑到「連累」美國隊無緣衞冕萊德盃。
活士明年可唔可以捲土重來真係未知之數，之不過憑同活士有染嘅「虎女郎」就乘勢銀，最紅爆嘅就係第11號「虎女郎」詹姆絲（JoslynJames），之前霉爆嘅詹姆絲獲片商出價100萬元拍小電影，成為最銀嘅「虎女郎」。