鄭秀文（Sammi）將於下月20日在澳門舉行一場日場室外演唱會，首度在澳門開騷的Sammi落力銷票，指澳門市民只花50元澳門幣，平過午飯的價錢便可欣賞，認真抵睇。對於舊愛許志安日前在局勢緊張的南韓機場轉機，Sammi表示不擔心。
鄭秀文前日在澳門出席「LOVEMI鄭秀文世界巡迴演唱會」記者會，穿上連身裙、黑色魚網絲襪的她宣佈下月20日在澳門舉行一場日場室外演唱會，由於個唱是澳門特別行政區政府主辦，門票為澳門幣200元（每人限買4張），持有澳門身份證的市民則可獲超抵價50元澳門幣購買一張門票，頭100名購票者更會獲贈簽名CD，抵睇到暈。
歌酬比香港高
首次在澳門開演唱會的Sammi會在下午2時開騷，她說：「我都未試過下晝喺outdoor做騷，感覺好得意，今次啲衫會有改動，好似當開party咁，啲衫可以再少布啲，犀利啲，因為我怕熱。」對於澳門居民可以超抵價購買門票，比香港平一大截，Sammi不忘賣廣告笑說：「澳門居民好抵睇，50蚊就睇到，平過一餐晏。香港歌迷都可以過嚟睇，不過下晝開騷冇咁多閃衫，閃都睇唔到。」她又讚澳門政府很好，給居民平價睇騷外，其歌酬也高過香港個唱。
在室外舉行演唱會，Sammi最擔心是未能帶動觀眾，也怕流汗太多，汗水黐住歌衫，令換衫時間不夠。她稱當日完騷後可留下品嚐美食，最想吃花生糖和蟹粥，又笑言自己要求很高。
憂南北韓打仗
提到南北韓日前開火，剛巧其舊愛許志安與Big4成員在南韓首爾轉機往美國演出Big4演唱會，問會否擔心？Sammi即說：「吓？唔會啦，佢哋喺機場之嘛，機場都應該好安全，應該冇問題。」會否擔心南北韓打仗？她說：「希望啲人歸順上帝，希望唔好咁（打仗），我都戥佢哋國家憂慮。」
採訪：胡比
攝影：彭琮然
