容祖兒前晚喺紅館舉行第6場演唱會，撐場嘉賓有黃耀明、鄭希怡同鍾舒漫等。其間祖兒身穿YSL低胸大露背晚裝上台，露腿大唱《痛愛》，又感性又性感，點知佢臨尾香，安哥唱《越唱越強》時突然唔小心仆低，好彩佢執生快，有驚無險冇整親。
全場冇聲
事發時祖兒企喺升降台唱緊《越》曲，唔知點解突然向後撻低，成個人跌坐在台上，由於事出突然，全場冇聲，幾秒後佢自行起身，笑住大叫：「我喺邊度跌低，就喺邊度起番身！」台下即時掌聲雷動，祖兒又大嗌：「特別送畀今晚嘅觀眾！」全場由驚變笑，祖兒真好嘢！
阿詩心痛
完騷後，祖兒喺凌晨3點微博留言自嘲：「行路冇事，跳舞冇事，飛上天冇事，偏偏企定定唱歌先發生意外，你們說雙子是否真的不甘平凡呀？不過，話說回來，我倒真的喜歡今天這個零預料的蝦look（碌），確實人歌合一，很有意境，令越唱越強變為越跌越強！」鍾欣桐、王菀之同經理人Mani分別留言問候，斷背密友何韻詩就笑住鬧：「衰女仲笑！唔該妳小心啦，叫聲妳大佬喇大佬。」
祖兒喺噚日開騷前，又喺微博繼續留言，「每天從彈台跳出來的那一刻，免不了還是有點忐忑緊張，因為在那兩個小時裏確實有太多未知之數是預計不來的……坐在這裏全都是愛我的人，是我的空港，他們在仰望我的下降，只要豁出去，甚麼都不用怕。」經歷過越跌越強，祖兒戰鬥力直情上升㖭啦！
