周麗淇（Niki）影視兩棲發展不俗，但她甘願停工一年，全情投入極難撈的出碟行列。日前其新碟雖已面世，Niki自知未必有錢賺，故已決定明年接電影之餘，更會開拍李添勝新劇填氹。
周麗淇今年不拍電影也不接劇集，全力炮製唱片，新碟日前出街，暫時未知銷量，但家姐周汶錡和身邊朋友當然撐到底，Niki日前接受電話訪問時說：「出碟嗰日我都未瞓醒，家姐就send咗一張喺HMV影嘅相，佢去買碟支持我，好愛佢呀。」
唱片市道低迷，Niki自知出碟不一定賺錢，她說：「其實下年我除咗拍劇外，家都傾緊電影劇本，會拍番戲。我冇後悔唱歌，我鍾意吖嘛，只係同一時間唔可以做咁多嘢，呢年至會專注搞出碟。市道差出碟未必賺到錢，但難得公司肯支持，所以我要喺其他渠道賺番錢。」
埋添哥堆博入屋
Niki明年1月將開拍李添勝新劇《大話情人》，據知其角色是失憶但性情率直的江湖義氣仔女，且與黃浩然有一大段恩怨情仇。之前Niki主演《秀才遇著兵》叫好又叫座，今次她會否希望憑添哥作品谷人氣？她說：「嗰時拍《秀才》入屋，我係深深體會到，但事前係冇諗過會有咁多人鍾意，呢次拍添哥嘅戲同樣冇諗自己第日會點，最緊要做好工作，始終兩年冇喺香港拍劇，都驚好陌生。」
採訪：夏琴 攝影：陳慧安 化妝：NaviLam
髮型：DebbyKwanofHair
場地：香港大排檔 服裝：連卡佛