明年初舉行嘅村代表選舉今日截止提名，鄉紳父老自己人嘅小圈子選舉遊戲，本應與外人無關，不過今屆選舉有矚目焦點，就係「新界王」劉皇發能否連任，截至昨日，發叔仍未報名參選老巢龍鼓灘村代表，八方問佢是否退下來，發叔大賣關子：「我會喺適當時候做適當嘅事。」
唔交表意味講掂數
一旦發叔唔選村代表，連鎖效應係佢屯門鄉事會主席之位都要讓賢，至於鄉議局主席寶座是否保得住，則明年才有分曉。有熟悉鄉事人士認為，如果發叔今日唔交表，應該意味已同各路人馬講掂數，可以續任鄉議局主席。
呢次發叔面臨挑戰，可以視為鄉事勢力嘅一次新陳代謝，躍躍欲試嘅何仙姑後人、屯門良田村何君堯係後起之秀，一直有傳佢會出選立法會，呢次村代表選舉之後，佢有幾多斤両，相信一目了然。另一值得留意嘅係寶蓮寺釋智慧大師都報名參選昂坪村代表，幾年前佢中風後，外界關注誰人接班，大師仍然有心有力選村代表，相信交棒事宜已然放下，善哉善哉。