有單身漢收到煤氣賬單發現收費異常，驗錶後證實煤氣錶失靈，換錶後每月煤氣費約200元。他計算有八個月共被多收千多元，惟按煤氣公司的計算方法，僅退回不足100元，事主直轟該公司調查欠透明度，用戶又無上訴途徑，小市民被迫支付無理徵費。
去年11月搬入筲箕灣一私人單位的黃先生，今年4月他發現自搬入起計每期（即兩個月）煤氣賬單收費一直高企，每期400多至700多元。「第一期賬單因為有600蚊按金，所以冇為意收緊咁貴，到第三期賬單我先發現上期同今期交成600至700幾蚊煤氣費，開始懷疑。我一個人住，又冇煮食，只係用嚟冲凉，冇理由咁貴」。他遂通知煤氣公司派員檢查爐具有否漏氣，師傅檢查後指無問題。
「佢嘅計法好有問題」
至6月收到賬單收費依然高企，煤氣公司建議他查錶，惟表明如證實無問題，須由用戶支付查錶費，他認為不合理，「煤氣錶係煤氣公司財物，冇理由要用戶畀錢驗佢哋嘅嘢」。與煤氣公司理論後終獲豁免收費，並證實煤氣錶損壞。
煤氣公司發現煤氣錶跳快4.6%，惟追溯期只有半年，按比例退回多繳煤氣費約100元。他一肚氣說：「佢7月換咗錶之後兩期煤氣費都係100幾蚊同200幾蚊，我入伙之後成8個月畀佢收多錢，我計過平均每個月收多成200蚊，總共收多成千幾蚊，家只係計番6個月，而且唔知點計，退唔夠100蚊。佢嘅計法好有問題，冇透明度，用戶又冇得上訴」。
不回應有何上訴機制
中華煤氣回覆，該公司分別於4月及6月安排技術員到黃先生家中檢查煤氣爐具、內喉及煤氣錶。6月測試證實煤氣錶運行較正常快4.6%，已於7月7日換錶。根據煤氣供應條款，該公司會退回因煤氣錶運行較正常快而多收的煤氣費，追溯期為半年；經扣除煤氣錶運行快的百分比後，退回8度用量，相等於煤氣費99.54元予黃先生。
客戶如對煤氣錶的準確性有懷疑，該公司可安排技術員測試。按供氣條款，如煤氣錶準確度在訂定標準（3%）以內，該公司會收取試錶費50元，如運行超出該標準不會收費，及免費更換新錶。惟該公司沒回應如客戶不滿意退費金額及有何上訴機制。
宜獨立架構處理爭抝
民間監管公共事業聯委會發言人蔡耀昌批評，煤氣公司佔有壟斷優勢，部份屋苑全鋪設煤氣管，住戶幾乎「焗」住使用。「煤氣裝置有問題出現爭拗，用戶又唔可以自己去檢驗，只有靠煤氣公司自己查番自己，行快幾多、退費幾多、追溯期幾耐，都係任佢噏」。蔡建議政府應設立獨立架構處理收費爭拗，為用戶提供申訴機制。
檔案編號：1025026
社會服務
◆報料熱線：29290000
◆社會服務熱線：29908288
◆蘋果日報慈善基金：29908688
◆電郵：mailto:[email protected]
◆傳真：37112468
◆網上捐款： http://charity.appledaily.com.hk/donate
◆各類表格： http://charity.appledaily.com.hk/forms
匿名投訴恕不處理。一經投訴，本報保留刊登權利。