近呢幾個月，香港幾大地產商可謂俾官府玩到謝，呢邊廂無厘頭整個「關愛基金」揼佢哋心口，要佢哋億億聲咁豪出嚟扶貧；另一邊廂又連番出招砌樓市。以往官府同大孖沙之間嘅「河蟹」灰飛煙滅，大孖沙就好似阿耶穌哥話齋，敵人打你左邊面，應該畀埋右邊面佢打，呢鋪真係摑到口腫面腫。
捐關愛基金 要「諗諗先」
唔知係咪官府摑得太狠，就快升呢做阿爺同太爺嘅新世界（017）董事總經理鄭家純同主席鄭裕彤父子，噚日出席股東會心情好一般，先係純官俾人問仲會唔會捐錢去關愛基金，佢淡淡然話「諗諗先！」呢個答案真係耐人尋味，事關同佢早幾個月喺業績記者會大講市民置業問題嗰陣，認為商界有責任同義務去配合政府扶貧嘅積極態度，有好大分別，唔通佢諗起樓價就快要跌一成，新世界賣樓都可能要減少少價？
Well，上個月關愛基金出爐嗰陣，新世界都有話過會捐錢，但就唔似新地（016）、恒地（012）咁打響鑼鼓話會捐4億，亦無參照「握手誠」咁捐5億咁多，但係華華覺得純官超精靈囉，家分分鐘唔likey就唔捐咁多，唔似得其他幾家人咁無路可退。
至於一向同記者非常吹得幾嘴、由鋤Dee講到恒指嘅彤叔，直頭係冷淡到令華華有啲意外！佢俾成班傳媒圍攻，都只係肯評論咗兩句股市咁多──「港股上上落落梗係有，唔通大起大跌咩！」彤叔幾時變咗證監會發言人呢？
李華華
mailto:[email protected]