周秀娜（Chrissie）走紅後，身價不可同日而語，昔日行天橋騷無論內衣還是泳衣不論大小通通照殺，如今接內衣騷變成斬件上，露上不露下，胸圍配黑色長褲，現身也僅幾分鐘，比吃一個杯麪還要快，難為同場兩名寂寂無聞的模特兒穿上內衣褲冒寒企足全程，娜姐果然有非凡待遇！
周秀娜昨日在尖沙嘴出席內衣天橋騷，大會安排另外兩名模特兒示範多款內衣，娜姐就做壓軸嘉賓，在最後一刻以胸圍配黑色長褲打扮上台，再和兩名模特兒合照，亮相僅數分鐘便急返後台換回便服再出台，非常錫身，反而同場兩名模特兒就要穿內衣褲企足全場。
難度期影月曆
娜姐說：「事前有講明要着內衣，不過就冇講下半身要着乜，今日嚟到至試身，自己準備咗條短褲，不過帶咗嚟之後發覺同上身個bra唔係好襯，所以就冇着到，最重要係size啱，事前溝通好，最緊要都係出嚟效果靚。」
問娜姐是否要高價才願意騷身材？娜姐初時指價錢是公司負責洽談，自己並不知情，但在追問之下，她改口說：「酬金好滿意啦，人需要有進步，需要有進步空間。」
提到有幾名o靚模將推出2011年的性感月曆，但娜姐今年卻未有動靜，她說：「本來有諗過出，不過因為個期就唔到，所以今年唔會影月曆，而且我想有新idea，月曆上年都做過，唔想就咁影相就算。」採訪、攝影：魯萍
