李首富早排掟咗3億元出嚟話做善事，搞咗個「香港仁愛香港」計劃，任何人都可以提交社會服務計劃，經網上投票，眾望所歸者就派錢實行計劃。首批得到首富資助嘅計劃終於有結果，有169個計劃獲批共2,740萬元。
八方早排寫過有80後想出本叫《我住狗竇》嘅書，希望用首富嘅錢講吓蝸居族嘅生活百態，反映吓點解德國柏林人用三年就可以供甩樓層，香港人卻俾層樓「困」足廿年。結果呢個計劃成功抵壘，獲首富資助。咁多個慈善計劃，八方就好鍾意聖巴拿巴會之家呢個「露宿者自立支援──有機蘑菇種植計劃」，用30萬教露宿者在室內種植有機蘑菇，幫失意人做心靈治療，work唔worko架？