勞工處處長謝凌潔貞下月升任教育局常秘，謝太喺勞工處做咗三年幾，佢話最難忘係處理扎鐵工潮，當年佢到任冇耐，人生路不熟，好彩最終成功拆彈。謝太係唔係拆彈專家，八方唔知，不過佢轉去教育局後，肯定大把機會拆彈，直資學校賬目混亂被審計署狠批呢壇嘢，正待佢上任處理。
謝太今個星期六會最後一次以勞工處處長身份出席公開場合，佢噚日同記者茶敍，一時興起即席清唱兩首舊歌，唱得有板有眼，可惜唔係好多人識欣賞。謝太同八方呻，囡囡成日投訴佢唱歌難聽。謝太過檔教育局前會休息個幾星期充電，打算利用假期補鐘，雖然廿幾年前已攞牌，但婚後一直由丈夫車出車入，個牌雪藏多年，要補鐘先敢再揸車。