張學友昨日於紅磡舉行「張學友1/2世紀演唱會」記招，對於今年頒獎禮取消四台聯頒，學友大表贊同，他認為有些頒獎禮指明不頒獎給某些歌手，會影響頒獎禮的客觀性，矛頭擺明指向無綫。
張學友即將開騷，名為「張學友1/2世紀演唱會」，記招昨於紅磡一酒店舉行，巡迴首站為上海，香港站定於明年4月15至18、21至25日於紅館舉行，最貴票價680元。
自認一條牛命
今次學友兼任藝術總監，他不肯透露細節，只笑言：「我都想上台講幾句多謝，但同人唔同命，我一條牛命，總之今次大家睇完會同我講句『辛苦晒』啦，都係唱吓跳吓，今次連舞台同短片都要理埋。」
對於今年取消四台聯頒，學友大表支持：「有啲頒獎禮指明唔頒畀某啲歌手，但佢哋有唱歌、有歌運作、又有人鍾意佢嘅歌。今次決定係進步嘅表現，因為冇堅持就冇好嘅頒獎禮，當中有太多利益、太多人同人之間嘅關係因素。」無綫與四大唱片反目，屬環球旗下的學友，擺明向無綫的勁歌頒獎禮發炮。
信陳淑芬清白
此外，對於之前一名前員工與學友經理人陳淑芬有金錢糾紛，學友力撐經理人說：「件事已進入司法程序，佢曾經提議我小心揀經理人，我知道呢個人係陳生陳太嘅學生，就算我唔同陳太做，都唔會同佢做。因為我個人守舊，一個咁對老師嘅人我唔會信，多謝佢嘅提議，但我唔會考慮。」陳淑芬指事件是有人一直利用學友之名炒作：「有人一直喺內地受訪，去圓自己嘅謊話，我已經向法院申請反訴，法院已受理並立案。」
採訪、攝影：藍文浩
