前晚歐美股市受南北韓局勢影響，反覆下挫，由於港股早過花旗股市反映南北韓交火事件，所以噚日有條件反彈，但收市只能保住127點升幅，反映人心依然虛怯。
從最新局勢發展睇嚟，南北韓緊張嘅局勢暫時唔會升級，但中美政治角力會因為呢次事件又再浮現。花旗股市暫時係上落市，波動區域10900至11500。港股暫時乏力重上24000樓上，但22600至22800會有幾強嘅支持。
海油服務C輪26403：海油服務（2883）報收14.12元，升1個價位。股價早前回至20日線現支持，整固後回復升勢，現於10日線反覆，技術走勢改善，有機會升破前高位15.08元，向16.20元推進，可以諗吓隻C輪26403。
隻輪現價22.2仙，2011年5月30日到期，行使價14.40元，溢價17.7%，引伸波幅59.7%，槓桿率6.4倍（有效3.6倍），正股升上16.20元，26403睇35.3仙，升幅近6成，正股跌穿13.20元就沽咗隻輪。
俊樺