港英餘孽終於露出狐狸尾巴了！英國爵士曾蔭權潛伏特區多年，苦苦等候機會，噚日終於作反，公然舉行公投，擺明同中央搞對抗。
呢個港獨勾當，在禮賓府facebook「上亞厘畢道」串連，早前本地青少年畫家畫咗21幅描繪禮賓府嘅作品，好多網民睇過後熱烈讚好，特首辦以與「更多市民分享這些出色作品」為由，昨日起至12月1日下午6點鐘，網民可以畀個「like」心水作品，得到最多「like」嘅作品，就會成為今年特首辦聖誕e-card。
呢個網上投票活動，有句口號「你有份揀」，顯然係變相公投，對於特首支持公投，八方本應好歡喜，不過魔鬼在細節之中，睇真啲，公投有個規則，就係「如有任何爭議，特首辦保留最終決定權」，即係最後可能都係煲呔說了算。