大家唔好誤會，我哋唔係gay，手上嘅戒指，都係對女友嘅承諾。
拍咗3年划艇，我哋唯一共通點就係都有另一半支持自己（划艇），其他事都好似南轅北轍。我（蘇）性格偏柔，好似女人，唔係好剛強嗰種，喺雙人艇上負責「跟槳」、發號司令嗰個，像單車嘅黃金寶，勝在經驗多；佢（鄒）性格較中性，不柔也不剛，喺比賽中係「帶槳」一個，好似單車嘅郭灝霆（阿寶師弟），咩都聽我講。
唔划艇邊有咁多人工
仲有乜嘢相似？可能係大家冇划艇嘅話，都只係nobody。我（蘇）中四中途走去讀「毅進」，不划艇，我可能係個勞動階層嘅人，做擔泥都話唔埋，但一定攞唔到家划艇嘅「人工」（約15,000元）；呢方面嘅保障，多少會成為我一直扒落去嘅動力。
我（鄒）都好唔到去邊，有張金融高級文憑，唔係划艇嘅話，我可能係個銷售員，一定賺唔到家嘅錢；雖然一開始做全職運動員（04年）時，賺嘅人工不多，得幾千蚊，但勝在多勞多得，有好成績就會一路加上去。今次攞到亞運銀牌，明年4月會升上「精英A級」人工（約兩萬多元），未必係一般24歲仔賺得到。
划雙人艇，默契、技術同樣重要，我哋增進默契嘅方法，就係日練夜練，比見女友嘅時間仲多。記者：徐嘉華
蘇秀華/鄒廣榮
（廣州亞運雙人雙槳銀牌）
蘇秀華（25歲）與鄒廣榮（24歲）這對拍檔在雙人艇合作了3年多，佳作是去年香港東亞運1金；今次是蘇/鄒組合首戰亞運，結果拿到全支香港划艇隊最佳成績。