直資學校糊塗賬越揭越離譜,英中德望豪花4.2萬元興建狗屋,究竟校方養乜嘢名種狗,要整間富貴狗屋畀狗住呢?有舊生爆料,指幾年前校內養有幾隻洛威拿,因為校園位處飛鵝山腳,不時有偷渡客出沒,雖然有24小時保安,但為安全計,養多幾隻狗守門口穩陣啲。
李慧琼打退堂鼓
民建聯李慧琼女兒讀小三,佢話本來想畀個女讀直資中學,但睇完審計報告即時打退堂鼓,對直資學校冇乜信心,都係報讀一般津中有保障。永恒的保皇黨梁劉柔芬議員係德望舊生,佢當然係幫校方講好說話,認為直資制度就係要畀多啲彈性學校管理層,呢個制度冇需要檢討,又指不屬於公帑嘅資金,應該容許靈活運用,就算攞筆錢去投資都無可厚非。「點解唔畀人錢搵錢?可能將來擴建,得益都係學校喎。」
立法會秘書長吳文華亦係德望出品,不過佢話冇乜參與舊生活動,唔係校友會成員,亦好耐冇同校友會聯絡,佢1969年畢業,後來轉去瑪利諾讀書,「母校炒股令我都好奇怪」。