海南島實試：Phaeton公路贏晒　豪華唔招積

海南島實試：
Phaeton公路贏晒　豪華唔招積

有錢人分兩種，有大劉般高調具台型嘅，又或彤叔般實事實幹偏向低調嘅。就如今次海南島實試2011全新Phaeton一樣，外表高貴但不至鋒芒畢露，內櫳豪華舒適先夠務實。揸起上嚟，享受嘅唔係虛榮，而係體貼乘坐感同駕駛樂趣。

記者、攝影：徐影龍

聰明頭燈自動轉向

福士全新Phaeton年頭剛喺北京車展亮相，香港廠方已安排年中試車。雖然廠方一口氣公佈4款引擎型號，不過今番到海南島三亞試戰，係最啱香港路面嘅3.6LTSI。外觀上，就算唔係增加12cm嘅長陣版，一望標準版已知2011Phaeton仍走大型轎車格局，保留VW家族式設計，除電鍍鬼面罩擴闊加大、更具氣派外，前後泵把亦從新設計，而霧燈、側鏡指揮燈、尾燈等，均全換上更亮眼既LED，HID頭燈組更首度加入DLA功能（動態照明系統），鏡頭分析車前情況，自動調校大燈指向，比跟軚盤轉向頭燈更先進。叫得大型轎車，內櫳空間肯定夠闊落豪華。除獲獎嘅18個方向調校座椅，當然一如過往，Alcantara真皮、雪櫃、多媒體系統等，全都可付錢一一個性化。視覺上，木料、電鍍及真皮，搭配上舒服順眼，風格偏向沉實穩重，後生仔要威要型未必啱。

■HID頭燈會因應車前鏡頭而分析數據，自動調整大燈角度。

■發佈會上，擺放咗最頂級嘅W12版本。

■憑藉4Motion功能，遇着泥路濕地，一樣穩如泰山。

■測試型號為V6版，車身雖沉，但直路疾駛仍具火氣。

■幼身木質軚盤貴氣之餘，操控感及路面感亦不俗。

■中控台及波棍位，有齊鍍金、木料等襯托，甚具氣派。

V6偈加速有勁

新車配備4款引擎，3.0LV6TDI行柴油，香港唔啱用，除4.2LV8、6.0LW12外，對港人嚟講，更為實際嘅係3.6LV6FSI，所以廠方都安排呢個型號作試車之用。走在三亞，少不免走番轉天涯海角，途中避開繁忙市集，穿過一大列酒店區，再到碧海藍天既名勝地標。揸完半日，體驗到座椅曲線設計，以及真皮軟熟度，調整平衡度相當高，腰骨無叫痛，PatPat無坐到滾燙，大長途旅程一樣令人愜意。
回程自選路徑，誤打誤撞闖到一截未完成嘅公路，由於舉目無車，駕駛上可以更暢快淋漓。V6版具280匹馬力，車身雖紮實沉厚，但加速起嚟相當順暢有勁，加上4Motion聰明四驅系統以及6速波箱，轉彎時收放自如，難怪0-100km/h都只需8.6秒，以大型轎車格局嚟計，行駛時頗具霸氣，走在這段無人駕駛路段，實有幾分公路我行晒嘅氣概。

■在無車公路上，揸得相當痛快淋漓，發揮出280匹應有表現。

■駛過天涯海角，風景如畫，揸長途車一樣可以好舒服。

■尾部線條變化最大，連尾燈都換上LED及超型「薰黑」燈罩。

■四座版後座控制台，有齊座椅、冷氣調校，相當搶眼醒目。

■經過車多人多路面，波箱喺停停開開間，反應仍迅速。

VolkswagenPhaeton2011　規格

引擎：3,597ccV6FSI
馬力：280ps/6,300rpm
扭力：370Nm/3,500rpm
傳動：6速+/-波箱、四驅
到港日期及售價：待定
查詢：VolkswagenHK（36989688）