為討好阿爺，梁振英（CY）本月中公開質疑劉曉波唔應該係首個攞諾貝爾和平獎嘅中國人，反指89年決定屠殺學生平民嘅鄧小平才實至名歸，呢番膚淺言論，連全國政協委員劉夢熊都鬧梁振英欠缺政治智慧。
「不知說法出自何處」
梁振英當日仲有評論趙連海事件，直指趙連海言行「可能會有啲過激」，呢個說法引起唔少人批評。噚日梁振英在個人網誌辯解，話當日回答主持蔡子強關於趙連海判刑問題時，「並未說過趙連海的行為過激。我不知道這個說法出自何處」。
當年刊登聲明「強烈譴責中共當權者血腥屠殺民運學生」，今日可以話鄧小平應攞諾貝爾和平獎都噏得出，梁振英選擇性失憶又發作。有片有真相，八方翻睇片段，梁振英當日回答記者提問時，有以下說法：「我覺得（趙連海）呢個問題，唔能夠單從法律考慮，我哋都要考慮到人情同道理，任何父母，當佢嘅仔女健康同權益福利受到侵犯嘅時候，任何父母都會有反應，亦喺某啲情況下可能會有啲過激嘅反應」。