頭面大改造　型格闊斗車

人車合一唔係講駕駛技術咁簡單，仲要同架車夾埋型格，咁先至襯得起佢，好似高頭大馬的三菱L200Sportero，唔係個個襯得起，最近小改款後，除繼續保持粗獷形象，加花臣帶出溫柔，扮瀟灑就最啱！

記者：趙慧敏
攝影：譚盈傑
Model：Suki@GMEModels

改款迎合型人

雖則L200Sportero屬農夫車，不過喺香港究竟有幾多個農夫會揸住佢開工？我諗真係有數得計。今時今日揸住架農夫車出街，車斗當然唔再放蔬菜雜貨，用來放潛水衣及滑水板就最啱。為咗令更多型人臣服，推出咗一段時間的L200Sportero當然唔會一本通書睇到老，間唔中改吓款，咁至滿足到班型人貪新鮮的性格。

■於新加坡更變身成警車呢！

閃令面罩更立體

呢架小改款推出，雖算不上翻天覆地，但總給人新鮮感，最大的改變集中在車頭，原來兩組斜紋鬼面罩換上閃亮電鍍飾面，亦令整個鬼面罩更添立體感。再配襯起新設計的一體式霧燈與氣壩，令全車感覺更年輕。

■頭燈設計充滿粗獷味。

■配上電鍍飾面的鬼面罩，車頭增添立體感。

圓柱腳踏　點點Cutie

車身達5,000×1,800×1,780mm，在街上行駛時猶如巨無霸，廠方將原本有磨砂效果電鍍四輪輪拱稍稍變身，改為車身原色，即時將車形改得更修長，個人覺得粗獷味雖稍稍減少，不過外形添上斯文感覺，強化了返工車與假期遊兼備之優點。不過純粹主觀感覺，車身兩旁的圓柱形腳踏最討我歡心，圓碌碌十分Cute，與一般硬邦邦一塊式腳踏，設計實在有誠意得多。