根正苗紅嘅民建聯創黨主席、立法會主席曾鈺成，同喺六七暴動時派反動傳單入獄、家陣係特區高官嘅曾德成，可以話係本地傳統左派模範人物，曾鈺成接受香港電台訪問時，自爆兩兄弟一段鮮為人知嘅赤色歷史。
家傳熱籐條炆豬肉
曾鈺成話細個時家住西環，父親中學未讀完就去咗中華總商會前身「華商總會」打工，由於當年未易幟，華商總會未染紅，父親一直覺得政治好污糟，望子成龍，最想曾鈺成做科學家高尚工作。回首歷史，曾鈺成話當年屋企唯一國民教育，就係父親在10.1攞本《人民畫報》返屋企畀幾個細路睇。曾家管教甚嚴，曾鈺成憶苦思甜，指當年父親會先用滾水煲熱籐條先打仔，曾家秘方熱籐條炆豬肉，滋味畢生難忘。
1966年暑假，曾家舉家到廣州旅行，當年曾鈺成僅19歲，佢話唔去猶自可，一去即變「左」！佢驚嘆祖國之偉大，「中六、中七開始左左哋」，返港後頓成毛澤東、魯迅粉絲，返學校就同書友仔猛講遊大陸見聞，盛讚國家點好點好。但係好衰唔衰，當時內地三反五反大躍進，港人反共情緒高漲，曾鈺成父親在中華總商會打工，令佢都俾人指罵，「當時個個同學都神色怪異」。
一直以為自己左傾好「進步」嘅曾鈺成，話直到細佬德成在學校內派反英抗暴傳單被捕，先驚覺原本家中左仔不獨佢一人，細佬仲先進過佢，自此兩兄弟先知道大家同一個Channel，「我好奇怪，我估唔到細佬有咁嘅思想。呢單嘢後，大家反而多咗嘢傾，平日好少傾國家社會問題」。
為爭寵細時冇偈傾
曾鈺成解釋，兩兄弟細路仔時感情一般，冇乜偈傾，「可能係有競爭心態，父母亦唔太識教仔，我覺得阿媽偏心細佬，佢又覺得阿媽偏心我」。曾德成入獄後，曾鈺成話兩兄弟先開始有多啲偈傾，佢又透露當年好多「大人」幫手，所以曾德成在獄中「冇乜俾惡勢力蝦」。
曾鈺成又話月前到越南，當地港商指越南人法治觀念強過大陸人，因為越南曾被法國殖民統治多年，同英治下香港一樣，曾鈺成惟有默認，無話可說。
mailto:[email protected]