對手講多錯多，可能令唐英年坐享其成，港大民意研究計劃本月8日至12日以電話訪問千幾個巿民，發現特首曾蔭權仍然係最為人熟悉政治人物，排第二位嘅係唐公子，季軍則係黃毓民。
半年前同樣調查，曾蔭權係一哥，唐公子排第四，黃毓民排第二，今個月一升一跌，調查機構話顯示近期政治環境有所改變。雖然屈居第二，不過唐公子都飲得杯落，因為其他對手，即係梁振英、曾俊華、范太同葉劉等人，一律榜上無名。
上次調查位列市民最熟悉政治人物嘅包括陳方安生同梁家傑，今次兩人雙雙出局，由李卓人、曾鈺成頂上，劉慧卿、余若薇、李柱銘同梁國雄係呢個榜常客，都係巿民長期熟悉嘅政治人物。呢個榜只計熟悉程度，唔係民望支持程度。