噚晚打完亞運女子沙灘排球決賽，電視無直播真係有啲失望！XB360新推《KinectSports》，好似知大家極欲開波，新追加全體感沙灘排球；親身落場，會唔會更加熱血沸騰呢？
記者：許福合
攝影：楊錦文
Model：Kinki@PureModels
回波講Timing
《KinectSports》之前公開示範版，只能玩足球、田徑同保齡球；今次正式版到手，發現多加咗沙灘排球、拳擊同桌球。沙灘排球跟足國際賽例，打2對2模式；知你屋企打波湊腳難，同Team玩家會同電腦NPC合作2Play；角色移動基本交由電腦控制，咪打得興起通屋跑，走出鏡頭就無戲唱喇！遊玩重點放喺掌握擊球時間，擊球前會出現粉紅色排球圖示，限時內在畫面同一位置做出擊球動作，就可以將排球打出。
揮手指向扣殺
齋搓波！又點贏錦標賽？想贏波，都係要靠扣殺得分！不過大家咪亂「殺」，出招前需符合幾個條件；最先決係排球要喺網前，飛到頭頂時，畫面一出現Jump，你就要馬上雙腳離地、揮手殺球！最厲害係Kinect仲可以辨識玩家嘅「左扣右殺」，秘訣當然係殺落敵方場區空位啦。相反！玩家如處於防守下風，電腦扣殺時，你頭頂會馬上出現雙掌封網圖示，不過絕對係稍縱即逝，呢啲咪考反應囉！
基本動作 睇住嚟練
XBOX（30714868）
同場加映
Kinect主打新Game
YourShape：FitnessEvolved
練瑜伽、耍太極，體感做瘦身運動，仲Pro到幫你計埋消耗幾多卡路里。
Kinectimals
將老虎、獅子變家中寵物，有虛擬接觸兼互動，愛心爆棚女友想養寵物？救星到！
KinectAdventures
有5種冒險遊戲，最正係身處深海玻璃艙，要用手腳擋住漏水，緊張刺激！
KinectJoyRide
隔空扮揸軚，就可以操控架車嘅轉向、玩飄移、噴射加速及各種蠱惑道具。
新體感腦力鍛煉
有計算、反射、判斷、記憶、動作等問題，玩家以身體作答，測試「腦年齡」。
SONICFREERIDERS
玩家變身超音鼠，以傾斜身體控制飛行滑板轉向，及做出跳躍、翻轉等特技動作。
