菜園村危在旦夕，長毛以有急切性為由，提出在今日立法會會議上討論延遲搬村問題。本來佢都係博一博，皆因政府唔想節外生枝，肯定唔想佢問長問短，不過主席曾鈺成今次幫理不幫親，竟然批准長毛今日提問，十分罕見。
本月19日係搬村限期，政府後來話押後至月底，長毛指由於村民「誓死保村」，擔心稍後收地時有衝突，所以要求當局講明會如何「人性化處理」收村事宜，否則口講無憑，無從追究。長毛又建議政府同村民協商一個清拆時間表，唔使居民日日擔驚受怕，夜夜睡不安寧，加上青苗賠償問題未傾掂數，最好延遲六個月先收地，等賠償講到清清楚楚先開工，皆大歡喜啦。