呢個禮拜五係花旗國嘅BlackFriday？冇錯！但又唔係13號，無情情點解係黑色星期五呢？查實呢個黑色星期五係指感恩節翌日嘅禮拜五，而且仲係年底銷售旺季開始嘅第一日㖭！
關於呢個黑色星期五嘅來源，有兩個講法，有人話，好多商店喺黑色星期五之前都蝕緊錢，憑年底銷售旺季一鋪翻身，將盤數由紅字（蝕錢）變黑字（賺錢）；亦都有人話，好多商店都會趁黑色星期五減價促銷，顧客瞓身撲貨，容易發生人踩人嘅悲劇，所以係黑色星期五云云。
係咪咁黑到時至知，之但係花旗國經濟唔多掂，啲零售商一定要各出奇謀吸客，嚟緊嘅黑色星期五，當地連鎖零售一哥沃爾瑪（Wal-Mart），會同網上零售一哥亞馬遜（Amazon）嚟個正面交鋒㖭﹗沃爾瑪話，嗰日會大搞「買貴退差價」活動，而亞馬遜就話會提供格價軟件，鹿死誰手，拗過手瓜至知咯﹗
李華華