區旗區徽不能亂用，否則隨時犯法，近日竟然有公職人員因為亂用區徽而被政府控告，罰款700元。呢單案件主角係東涌名人小業主林悅，佢早排獲民政事務總署委任做離島分區委員會委員，雖然只係奀豬到不得了嘅街坊式公職，不過林悅都好歡喜，急不及待掛橫額告知街坊「無懼風雨、與您同路」，幅橫額左上角印上區徽，以示權威。
點知使用區徽原來係要經特首批准，八方相信有人舉報，結果林悅俾警察落案起訴，控告佢觸犯《區旗及區徽條例》，判罰700蚊。林悅另一張宣傳地區服務嘅橫額，印有律師會、奧比斯等機構標誌，亦都俾相關機構叫停，唔好亂用啲標誌。林悅承認唔夠政治敏感，希望外界唔好再炒作呢單嘢。選舉當前，唔炒作？難啲喎。人在江湖，食得鹹魚要抵得渴。