港股喺政府公佈新嘅調控樓市措施之後嘅首個交易日表現唔差，噚日就走晒樣，除咗因為內地股市再度顯著滑落之外，晏晝突然傳嚟北韓向南韓開火嘅消息，恒指即刻大插，最後跌627點收市，報22896。
大市成交雖然唔算增加太多，但恒指跌穿50日線，始終會增加投資者嘅戒心，恒指企喺22680至22880支持區上面收市，暫時仲安全，不過南北韓局勢嘅發展未明朗，股市仍會好波動。
招金C輪25361：招金礦業（1818）收報27.75元，跌0.8%。股價幾日前跌穿20日線之後迅速反彈，呢幾日走勢幾穩，就算噚日大跌市，招金跌幅都好溫和，短線有機會上試30元關，破位睇32元，可以諗吓隻C輪25361。
隻輪現價36.5仙，明年5月4日到期，行使價28.28元，溢價15.1%，引伸波幅53.7%，槓桿率7.6倍（有效4.1倍），正股見32元，25361睇63.3仙，升幅73%，正股跌穿26.20元就沽咗隻輪。
俊樺