縱橫股海39年嘅安東尼．波頓可謂身經百戰，仲俾市場封做歐洲股神，今年4月佢重出江湖，坐鎮富達中國特別情況基金，短短半年每股淨資產回報7.7%，股價仲勁升13.2%，跑贏同期只得1.4%回報嘅MSCI中國指數。
股神駕到，自然吸引四方八面嘅信徒朝聖，主人家外國記者會（FCC）話，佢哋將股神開壇嘅消息擺上網冇幾耐已經有好多人報名，午餐會quota極速full晒。
承蒙信徒嘅厚愛，波頓仲大賣口乖，話香港處於發達國家同新興國家嘅交滙點，一方面貨幣政策同美國聯繫，一方面同內地有大量貿易往來，所以香港未來一定會有大轉變，而呢個轉變一定會對金融市場產生好大影響，所以香港好值得關注。
為咗見證香港呢個轉變，佢仲喺4月買咗層樓，咁家陣層樓樓價升咗，佢會唔會放呢？股神就無正面回應，只係反問有冇人有興趣接佢貨，唔通，個樓市就快……
李華華