如果唔係太太反對，我本來打算亞運後再努力「造人」，希望喺生BB方面可以超越珊珊（李麗珊）。喺成績上，雖然我同珊珊一樣都攞到兩塊亞運金牌，但比賽上我仲差好遠，我最好嘅奧運成績得第6；家庭方面，珊珊生了兩個女，我希望生夠3個，最好全部係仔，可以同我玩。
講真，如果今次唔係囝囝嘅力量，我可能攞唔到亞運金牌。
我24歲結婚、27歲生囝囝（陳靖11個月大），係個家庭觀念極重嘅人，我覺得一個家至少要有2至3個仔女先算完整。呢個觀念嚟自我嘅滑浪風帆事業，中五畢業開始轉做全職運動員足足11年，我覺得做運動員好孤獨；尤其係我成日喺歐洲訓練，喺茫茫大海，只能靠自己，冇人幫到你，於是更想每次返到香港，有個家可以好窩心。
囝囝叫爸爸開心過奪金
我最記得囝囝7、8個月大時，第一次叫我「爸爸」，嗰種開心嘅程度，比今次拿亞運金牌更開心。我本來想過咗亞運後，就立刻生第2個，可以有個細佬或者細妹陪靖靖；但太太家除咗幼稚園工作外，仲要讀書，大約一年半後先讀完，所以會同佢商量生BB嘅時間。問我？當然係越快越好。
明年會畀囝囝玩滑浪風帆，唔係繼承衣缽，只係佢天生好動。記者：徐嘉華