終於等到喇！我都話美少女一定有個變身手環/神仙棒o架啦！等咗廿年，今日我終於在被譽為本世紀最精采的台北國際花卉博覽會中等到！戴上手環即刻變～身!巨型蟲蟲?唔緊要，等我吸吸吸多啲鮮花香氣，唔變長腿索女都要返老還童變細蚊！
記者、攝影：陳慧敏
鳴謝：台灣觀光協會、中華航空
夢想館最爆場
最爆場的夢想館，裏面，一朵花都無！91.8公頃的展區，以互動科技為主打，內含多個世界第一科技的場館最受歡迎。每日3,600張預約券只可現場排隊領。派飛阿姐說：「假期時排頭位等攞飛那位6點多就來啦！平時7時多都仲得。每日平均9:40am派完，有人9:30am來排隊都差點拿不到票！」最後一張的預約時間是晚上9點多，花博一日遊，時間長過返工！
360度互動影院 變身大肚蟲
入場時領隊姐姐派給每人一隻膠手環，你的身份變了一隻走入花叢的蟲蟲。手環隨着你參與的活動及心情變化，最後開出屬於你的花。途中有花精靈「叉電」位，叉得多，屏幕上你的蟲蟲大得越快，花兒長得越燦爛！我即「捐出」自己的手環給姐姐做demo拍照，叉了幾十下電！還不索爆全場？一走出去，居然變了隻超肥大肚腩螳螂！唔係嘛?！互動到最後，也是最震撼的360度互動屏幕影院，我最鍾意！變身花仙子在天空飛，海豚雲在你身邊跳來跳去，身邊阿伯篤我背脊「看後邊！」「請大家按着樹幹上的亮光，給森林輸入能量……」全場人即拍晒埋牆，連本來淡淡定抱孩子去按掣的大人都忽然撻着了細路mode，伸長手「注入能量」，由得細路在側邊跳住拍不到！
人龍求生術
1.準時：好多館有預約票，早點去拿吧。不同世博，花博預約券上的時間是「即時死亡」的，遲到了就作廢不補發，記得準時！
2.逆流而回：拿到預約券，若參觀時間是傍晚以後，可趁大軍殺到前乘車到最遠的圓山公園及美術公園，逆流而回省下排隊時間。有志工說閒日10:30am前到未來館及天使生活館多不用排隊。
3.下午睇毛毛蟲：3pm有幸福毛毛蟲大遊行，而大佳河濱公園大地花海因風災花兒須重種關係現仍有點「流」，可下午才去。
4.自備水：園內消費同市內差無幾，但飲水/汽水機唔多見，都係自備用水啦。
5.屋頂睇景：要看場館全景及台北市風景，首選未來館跟天使生活館的山坡，中午來排隊約半小時。時間不足可到G4新生出入口的資訊中心，2樓一樣看到，仲有個迷宮花園。
流行館捉正妹
「花與美人」幾時都係絕配！花博志工多是大學生，大都清湯掛麪不施脂粉，笑語盈盈又溫柔，給你講解各館資訊。其中流行館，即是之前常報道用回收再造的膠樽砌成，隨時可拆開運走的「遠東環生方舟」就最多靚女！
會場買禮物！
台灣花卉博覽會
門票：成人約$76.9
展期：即日至2011年4月25日
網址： http://www.2010taipeiexpo.tw
花博敷上臉！
為了花博，城中好多食肆都順勢推出「食花之宴」。10月初才開的阪急百貨地庫的ColdStone（聖石冰淇淋）都推出「花言巧語」雪糕，雖只將不嬲都有的玫瑰雪糕改個名趁熱鬧，但淋了滿滿玫瑰、藍莓及碎蛋糕的雪糕口感豐富，花瓣香氣在嘴裏散出（太大啖花瓣會苦，請陰啲陰啲食）。埋單時收銀機有大量「我的美麗日記」，原來是跟雪糕店crossover推出的大馬士革玫瑰冰淇淋面膜，玫瑰滋潤加香草木樨及牛奶蛋白保濕肌膚。花博期間在雪糕舖買一盒5塊只$30.6，平過去屈人寺買！好，就買佢做手信啦！
地址：信義區忠孝東路五段8號B2F
FloraExpo2010
溫馨提示：巴士站都有大量流動廁所，咁「大」個男女廁標誌，唔該睇清楚啦～！
TravelMemo
持BNO或特區護照而在港出生或曾訪台者，可於出發前登入： http://www.immigration.gov.tw
免費辦理入台證，中華旅行社：25258316
即日起於香港華航網站，於出發前最少五日購買二人同行台北經濟艙機票每位$1,400，包括NovotelHotel首晚住宿、花博入場券一張及會場單程專車服務。中華航空： http://www.china-airlines.com
1港元約兌3.9新台幣（文中價錢已折算港元）
110V，兩扁腳插座
台灣
台北
下周多雲有雨16-22℃
