劉嘉玲與甄子丹在新片《最強囍事》飾演甜蜜情侶，但昨日兩人出席記者會時，嘉玲毫不留情說話句句有骨。據悉她如此不滿甄子丹，除了因他之前曾寸過梁朝偉外，演出《最》片時，為遷就甄子丹的檔期，令所有演員一日要趕工20小時，難怪嘉玲找他出氣。
地球是圓的，前年因為梁朝偉要拍王家衛的《一代宗師》，甄子丹要拍《葉問》，兩片因為同是拍葉問題材，以致兩片經常被人拿來作比較，令偉仔和甄子丹頻生是非，豈料甄子丹最近會與偉仔老婆劉嘉玲合作拍賀歲片，還要合演情侶。
「又唔夠瞓會缺氧」
日前記者到拍攝現場探班，發現嘉玲和甄子丹除了拍戲，鮮有溝通，嘉玲更全場黑面。昨日《最》片在數碼港舉行記者會，除了他倆出席外，還有古天樂、內地女演員閻妮及汪圓圓等，現場還開香檳及切燒豬預祝拍攝順利，有份演出的張栢芝因病缺席。電影公司特別安排了甄子丹與嘉玲一起接受訪問，嘉玲全程側身坐，不肯正面對着甄子丹。
嘉玲向記者訴苦前晚才開工20小時，在旁的甄子丹表示之前已知道趕拍，嘉玲即有微言說：「我唔知，你知道唔通知我？」有點尷尬的甄子丹惟有說：「黃百鳴搵咗你笨喇！」問嘉玲若之前知道通告很密，是否不會接拍？她即說：「我噚晚都反映好耐，唔可以咁，我頂到，都驚出嚟唔好睇，喜劇對白好抵死，又唔夠瞓會缺氧。」
甄子丹片約不斷，問他是否要《最》片劇組遷就其檔期？嘉玲即寸他說：「我諗係，我唔係好忙咋，一定係趕佢啲期，趕到我哋咁。」甄子丹只好尷尬說：「大家都忙。」問他會否送補品給嘉玲補數？嘉玲即說：「佢家代言咩？」甄子丹指嘉玲大把補品，嘉玲便說：「我唔係好補。」
子丹知衰擦鞋補鑊
甄子丹被嘉玲句句啄到實，尷尬得無力招架，惟有轉移話題，他說：「不如講番正題，其實唔係好多叠住。」嘉玲又搶住說：「唔係，係一部接一部。」甄子丹說：「今年拍第三部，大家誤解咗，係一部接一部，但唔計聽日嗰部。」嘉玲當場瞪大雙眼說：「吓，你聽日又開工？就係咁，要搵佢收返OT。」
甄子丹見嘉玲頗有微言，便擦鞋補鑊說：「同嘉玲姐合作，喺佢身上學咗演技，好好玩。」有指今次是甄子丹點名想嘉玲演這角色，甄子丹即說：「我唔夠膽點名，我要求啫，如果搵到佢拍verygood，佢戲好、玩得、人又靚又後生，好難得咁賞面。」嘉玲聞言說：「嘩，你哋記住寫，多謝你欽點。」問嘉玲現在是否拍20個鐘都抵？她卻說：「咁又唔好。」
嘲葉問上身難抽離
嘉玲的老公梁朝偉跟甄子丹分別飾演葉問，問嘉玲覺誰較靚仔？她表示每個人心目中有個靚仔，他們都是個很強的人，都是香港電影界的代表。嘉玲指今次拍這部喜劇很好笑，甄子丹便說：「你笑我啫！」之後嘉玲一臉認真說：「最好笑係佢葉問上身嗰吓，變咗另一個人，我覺得你未喺個角色抽出嚟，太入戲，可以拍第三集。」記者指嘉玲愛人（梁朝偉）也演葉問，嘉玲即重申：「我愛人係一代宗師，唔好搞錯！」
採訪：溫敏芝
攝影：陳志嵐