過去幾日，港府最新穩定樓市措施成港人茶餘飯後話題，有人話政府出招狠，有人就續看輕打壓力量。筆者雖為樓市好友，但認為今次港府出的是狠招，措施亦切中時弊。市場料本地樓市兩年後供應將較顯著提高，但熱錢續流入，樓價不斷上升，令市民怨聲載道，紛紛投訴難以上車，若政府續袖手旁觀，這兩年供求將會更失衡，令泡沫更巨大。政府亦深知危機，今次出招主要都是壓抑需求，加印花稅即等於叫買家買完樓兩年內都唔好賣出，因為如果層樓唔升20%，兩年內賣出都係要蝕。當然，這類措施對吸收熱錢幫助不大，若熱錢續流入，樓市始終都係會升。
不過，政府這次出招除壓抑需求外，亦可能減少供應，因為業主將會揸住物業更長時間唔賣，樓市或會變得買賣兩閒。
炒家脫貨樓價回穩需時
現階段自己會睇淡一點，因為早輪入多了貨的炒家都會希望盡快脫貨求生，難免造成沽壓，要等過了這段時間炒家減少，樓價才會變得穩定，暫時看來，這段時間可能會比想像中略長一點。
一直以來，恒地（012）及新地（016）皆是樓市指標，昨齊齊下跌2%至3%，至於美聯（1200）昨由頭跌到尾，下跌17%，好似好誇張，但如上文所言，樓市可能會出現買賣兩閒情況，美聯業績純靠買賣，有如斯表現並不出奇；當然，唔可以只睇一兩日，要睇多幾日先知龍與鳳，從這幾隻股票應可以反推樓市波幅。
股市方面，上周末消息多多，如內地加存款準備金（暫時消除加息疑慮）、愛爾蘭將接受歐盟援助、香港出穩定樓市措施等，前兩者利好，後者利淡，昨期指雖跌73點，但H期則升42點，綜合來說算唔錯，亦有不少個股破頂，大調整應該可以避免。都係果句，唔可以單睇一日半日，但過多幾日都係唔跌的話，應可以繼續用大漲小回的策略了。
張士佳
寶來證券（香港）董事 投資服務部
mailto:[email protected]