田二少退黨，八方相信自由黨會漸漸回歸和諧，唔會再因為路線之爭而起爭拗。身兼自由黨副主席嘅方剛對於呢個黨內風波都好少理，因為自由黨有名你叫，人人都好自由，田二少有唔同意見好平常，不過身為黨員始終要有「黨性」，唔可以成日同個黨唱反調，既然田二少理念同黨路線唔同，退黨係冇辦法之中嘅辦法，佢話不排除有黨員會跟田二少離巢，但人數未必好多。
方剛特別大讚另一位副主席張宇人喺今次事件好忍得，一直冇喺公眾面前爆發不滿，EQ似乎較以前更勝一籌。而佢家最閉翳嘅就係由邊個人代替田二少接手明年區選部署行軍，佢個人認為前副主席周梁淑怡係最佳人選，稍後都要周太犧牲少少湊孫時間統領區選大軍。