自從做咗上市公司高層之後，星爺周星馳近嚟冇新作面世，今個星期五會公開露面喺會展開壇，接受由富豪二代組成嘅菁英會邀請，喺博鰲青年論壇上做演講嘉賓，同場仲有多位中、港高官、大學教授講嘢，金管局總裁陳德霖都有份，星爺以喜劇泰斗身份躋身咁高層次嘅論壇，確係巴閉又架勢。
博鰲青年論壇演講
博鰲青年論壇去年請到國務委員劉延東嚟香港做主禮嘉賓，今次星爺升呢，獲邀喺論壇上講嘢，題目係《文化產業與經濟發展》，主辦單位指星爺電影係創意產業成功典範，由佢講文化產業真係不作他選。星爺拍戲固然好睇，但講到搵錢方面嘅產業，星爺投資物業眼光同成績更令人嘆為觀止，山頂天比高個盤呎價要成10萬蚊，賺到盤滿缽滿，大會唔搵佢講買賣物業之道，真係天大損失。
據講當日星爺本來另有工作，但知道係講文化產業後，即時調動工作都要去會展開壇，同大家坐低飲啖茶、食個包慢慢傾，咁有誠意，八方當日都想到場學吓嘢。與星爺同場講呢個題目嘅仲有國家行政學院副院長周文彰教授、北京大學文化資源中心張頤武教授、聯合國教科文組織駐華代表辛格，至於陳德霖就會講後危機時代嘅亞洲金融，其實以星爺獨到投資眼光，呢個財經題目由佢講埋都冇難度。
星爺係娛樂圈中人，素來甚少沾手呢啲政治性活動，同富豪第二代雖然有交情，但都係異性為主，今次破格出場，八方聽聞有專人穿針引線，論壇籌備委員會秘書長曾鳳珠，曾任星爺打骰間上市公司比高集團獨立非執行董事，曾鳳珠今年8月初辭任，冇再跟星爺搵食。
劉延東去年曾出席
今年係第二次舉行博鰲青年論壇，去年主席係鄭志剛同霍啟剛，請到劉延東撐場，今年兩個主席分別係倪木同信和集團黃永光，信和仲做埋贊助機構，黃永光出錢出力，真係唔話得；另一贊助商係米蘭站，主辦單位自稱論壇「已成為香港標誌性品牌論壇」，係全港市民榮耀。
mailto:[email protected]