人生高高低低、起起跌跌，真係千算萬算都估唔到；好似我求大俠都好欣賞嘅香港單車好手黃金寶咁，噚日睇住佢喺公路賽衝輸畀南韓選手，以為失落金牌，好彩最後都上訴得直，終於攞番個金牌。
「我只係一個技術總監」
車路士領隊安察洛堤，上季雖然失落歐聯，但就幫球隊贏英超同英足盃雙料冠軍，都算威風；今季初聯賽5連勝，入波好似執豆咁易，但估唔到連輸畀新特蘭同伯明翰之後，竟然就搞到份工唔穩陣，成為下一位英超被炒領隊次熱門㖭。
上周六輸畀伯明翰後，安帥就發老脾，話自己有名冇實，英國《太陽報》報道安帥咁自嘲：「你搵費Sir同我比較？費Sir有完全控制權，我只係球隊一個技術總監，句號！」即係暗示自己冇一般英超領隊嘅買賣球員同用人權力。而且安帥已經秘密接觸英超領隊協會，商討自己嘅處境。《每日鏡報》仲話車仔已經唔打算同安帥續約。
周一反口唔認想走
不過好似電視劇咁，車仔周一已發出官方聲明，指呢啲全部唔屬實，安帥仲喺歐聯前記招公開否認離隊，又話冇搵協會求助，係協會主動搵佢；仲話都唔知啲謠言點嚟，真係唔知佢幾時真幾時假！唔通佢成功冧掂阿巴莫域治，多番啲權力先至由原本想博炒到轉口風？
話時話，呢排車仔真係七國咁亂，原任助教韋健士雖獲安帥射住，但都避唔過炒魷厄運，上仗球隊主場即刻吞足新特蘭3蛋。上周球會又無端端搵尼日利亞籍嘅艾文拿路接任助教，搞到安帥同助教雞同鴨講，等安帥冇癮又冇自己信得過嘅手下。
講堅，車仔雖然連敗，但都仲排喺英超榜首，歐聯又晨早出線，咁就要炒肥安，理由唔算充份。不過skybet開出嘅下任英超被炒領隊中，韋斯咸嘅格蘭仍然係1.83倍大熱，但肥安已由原本11倍，急跌至只得2.5倍嘅次熱，季初一直傳不穩嘅鶴臣、文仙尼等都冷過佢，真諷刺。
小資料：車路士領隊冇個做得長？
摩連奴自07年9月離開車路士之後，3年幾時間以嚟，車仔大大話話都換過成4位領隊；格蘭、軒迪克都只係臨時替工，而軒迪克上任已講明只教半季。而最令人失望梗係史高拉利，呢位巴西教頭僅教咗8個月就被炒。安察洛堤上季幫車仔贏雙料冠軍，原本佢個位都好穩，但近期車仔減晒速，唔通肥安真係唔可以打破摩連奴之後，冇一個領隊可以揸「車」兩季以上？文：牽牛
