北京不斷出手打壓趙連海，罕有地得到香港不少親北京人士聲援及同情。有政界人士指，趙連海案與劉曉波案性質不同，就算中共內部也對重罰趙連海持不同看法，更不排除有個別撐趙的香港親北京人士得到北京某些高層默許下活動，背後隨時涉及中共內部權爭。
借親京人士製造壓力
趙連海被重判後，羅范椒芬發起港區人大代表及政協委員聯署求情信，罕有地反應熱烈；部份親北京人士則高調批評中央，姿態之勇猛令人側目，包括政協委員劉夢熊一連數日嚴詞狠批北京當局。
有親北京政界人士指，部份力撐趙連海的人士一向緊貼北京一些領導人想法，「好似當年政改咁，佢哋係知道北京諗緊民主黨方案，於是先一步出嚟支持，為某啲有相同想法嘅領導人造吓勢」，所以某些人高調撐趙連海，不排除有中央高層幕後發功，「可能佢哋都唔滿意某啲人咁打趙連海，於是借香港班親北京人士製造壓力，出口轉內銷打擊另一派」。
一名泛民中人透露，早前與一些內地官員私下見面，對方對北京如此打壓趙連海頗有意見，「趙連海同劉曉波性質唔同，劉曉波係因為政治被判監，中共內部冇乜人有不同睇法，但趙連海係為結石寶寶出頭，有唔少中共官員都係人父母、都會同情佢，所以中共內部都有人唔滿意咁打佢」。本報記者