教宗本篤十六世喺新書《世界之光：教宗、教會和時代象徵》為個別情況使用安全套開綠燈，話好似娼妓咁，用安全套可以預防愛滋病，認為係邁向道德同負責任嘅第一步。
教宗呢番劃時代言論，令世人訝異，08年諾貝爾生理學或醫學獎得主弗朗索雅絲．巴爾-西諾西教授噚日去港大演講，向八方透露教宗轉軚內情。佢話去年3月本篤十六世出訪非洲，指安全套冇用，只會激化愛滋病問題後，她第一時間寫咗封信畀教宗，要求教宗諗清楚呢番安全套冇用論，係唔係真係會令愛滋病問題惡化。
事隔年多，教宗終於有回應，弗朗索雅絲．巴爾-西諾西話知道教宗轉軚後不知幾高興，仲大叫wonderful！佢話身為科學家，寫論文、做研究都唔係最重要，抱有貢獻人類嘅心先至最緊要。