人大再次為民請命，為趙連海伸寃後，亦為「跳水皇后」郭晶晶抱不平。互聯網早前流傳一段晶晶08年北京奧運會被人以紅外線攝錄機偷拍到三點盡露嘅片段，對於晶晶俾人偷拍，私隱受到嚴重侵犯，據聞霍家上下都激到紮紮跳。民建聯葉國謙代為出頭，聽日會喺立法會會議上提出口頭質詢，要求政府解釋如何規管呢類紅外線攝錄器材，防止有人作另類用途。
質詢紅外線攝錄規管
葉國謙同八方講，由於佢係民建聯民政事務發言人，負責研究保障私隱問題，所以好關心市民私隱被侵犯問題，佢強調自已絕對冇睇過晶晶俾人偷拍嘅片段，只係睇過新聞報道，其他資料由下屬提供。佢又話唔係晶晶fans，亦冇收到霍震霆「求助」，今次出手只係唔想有其他女士中招，希望政府可以做啲嘢。之不過今次負責答辯嘅係政制及內地事務局局長林D9，有「人肉錄音機」之稱嘅佢屬低科技產物，如何規管呢類紅外線攝錄器材，考起佢喎。