政府突出重招打壓樓市炒風，由於1年內易手的住宅要納10%至15%重稅，一層樓數月內易手幾次的情況將成絕響，今次壓炒風措施可說是非常有效，對美聯集團（1200）這類中介人將構成重創，今日跌一成以內都算少。
既然政府將游資趕離樓市，資金會否轉戰股市成為有趣的題目，假如今日A股可以止跌回穩，唔排除港股亦會轉旺。今次港股升浪基本上是不同行業層層炒上，惟獨是炒概念的二三線股無人吼，但從近期若干細價殼股被收購，可見已經開始有人趁平買定個殼，等有需要時用以轉型炒上。
其中一隻有留意價值的殼股是其士泛亞（508），該公司較早前突然大幅炒上，其後停牌，復牌公告披露其士泛亞已終止收購菲律賓採礦項目，因鑑於目前巿場環境及狀況，估計完成收購協議的所有先決條件無法完全滿足。該公司原計劃以6.48億元，間接參股菲律賓西內格羅磁鐵沙礦權，另外公司兩名執行董事已辭去職務。
表面上收購失敗應屬利淡消息，不過睇番張圖，其士泛亞股價由今年9月0.73元水平一路跌落0.30元水平，喪跌6成，所反映的是甚麼消息？收購終止加上董事局大變，理論上應該更值得憧憬有其他併購轉型消息。
買礦唔成可能更好
從上年度年報可見，集團的PacificCoffee及Igor's餐飲業務已開始步入收成期，不但營業額急升7成至5.38億元，毛利率亦由74%增至近79%，不計商譽攤銷等會計成本，呢盤生意實際係有不俗賺錢能力。集團淨持現金1.12億元，無負債，唔收購菲國礦業可能係好事，以PacificCoffee在中港的著名品牌，唔使愁無得做，其實集團更值得憧憬的，是發大餐飲主業，買礦唔成可能更好。其士泛亞上周五收0.34元，跌2.8%。
歐陽風