唔少人對「制服」天生有情意結，煲呔一樣唔例外，噚日佢出席「2010年制服團隊日」活動時，就俾現場一個個齊整又醒神嘅制服團隊成員感染，自爆兒時都有「制服誘惑」，好渴望參加制服團體，覺得一班志同道合嘅朋友一齊集訓、遠足、夜話甚至喺荒野上風餐露宿都係非常有意思喎。
可惜佢當時屋企環境唔好，兄弟姊妹又多喎，點夠錢去買制服？所以只可以將呢個慾念一直埋藏心中，暗暗嚮往制服團員嘅活動氣氛。雖然煲呔唔可以成為制服兵團，幸好佢嘅囝囝都幫佢圓心願，喺煲呔鼓勵下積極參與制服團體，煲呔仲喺今年《施政報告》建議成立新嘅制服團體「香港青年服務團」，可能都有唔少個人感情嘅投射在內。