政府終於出手遏樓市炒風，持貨半年就沽，除咗本來要畀樓價4.25%印花稅，仲要畀成15%額外印花稅，加埋佣金、律師費等，樓價升幅冇兩成以上，都可能要蝕本。要博短炒，炒股分分鐘抵博過炒樓，起碼易轉身。炒樓除了銀碼大、手續多，家陣又多一重顧慮。難怪名家魏力本來聽到政府打壓樓市，都驚自己個「百萬倉」要見紅，但冷靜過後反而認為有利股市。
但敏妮仍相信，香港樓市長線會升，RightTiming、RightLocation就算只買中一項，都唔會點輸，所以周五聽到政府公佈打擊樓市炒賣措施，名家王昇同敏妮都不約而同嗌：「終於等到機會買樓了！」
樓市長線升 錢多唔怕揸
當晚睇電視，有位去睇新樓盤嘅市民話，政府嘅措施令佢更難置業，原因係流動資金有限，買咗樓之後，資金被壓死，突然要資金周轉，賣樓套現本來已可能畀買家壓價，家陣仲要負擔額外徵稅，所以對「上車」買樓更裹足不前。
對於呢位市民嘅憂慮，的確係事實。敏妮就有個朋友，典型中產階級，除咗供自住嗰層物業，幾年前同老婆計過數，供多層樓嚟投資都應付得到，所以就買多層樓諗住收租兼博升值。點知喺呢一波樓市升浪前一、兩個月，朋友啱啱處於轉工交替時期，舊嗰份工冇咗，新工又唔知幾時搵番，驚應付唔到同時供自住同投資兩層樓，所以輸少少沽咗投資物業。賣樓後冇耐，佢搵番份工，但樓價急升，佢心理上同財政上都冇能力再入市。見到之前蝕讓層樓，樓價急升，佢慨嘆：「敏妮，你知唔知四叔李兆基點解做到『香港股神』？因為佢錢多，唔使認輸。」
呢啲就係所謂嘅HoldingPower。買樓自住都算係投資，投資就有風險，其實計過有充足首期，又應付到月供按揭，上車置業合情合理。機關算盡，要立於不敗之地，唔係一般人做得到。
溫敏妮
http://wanmanli.com/blogs/