你哋喺球場上見我跳殺、瞓身救波，似男仔多過似女仔；現實生活中，我咁大個女未買過一條裙、未着過一對高踭鞋、未留過長頭髮、未買過化妝品。你問我最恨做一般23歲女仔一件事，是想搵個男朋友。
其實近一年好多男隊友都問，使唔使介紹男仔俾我識，我都覺得係時候經歷愛情；因為我都23歲了，話大唔大、話細唔細，前一、兩年就話未成熟，怕拍拖會分心。家練習都重要，但我見過體壇好多例子，都覺得身邊有個鍾意體育嘅男朋友，可以一齊努力奮鬥；遇到唔開心時，有多個人可以傾訴。我擇偶條件好簡單，唔一定要靚仔，但一定唔可以食煙、飲酒、賭錢，要孝順，對我好就得。
唔打波一定留長髮
今屆亞運銅牌帶來嘅獎金（10萬元），我可能會買一些女仔啲嘅衫畀自己；媽咪成日話我唔打扮，我屋企衣櫃得十幾件衫，大部份係運動型，我想最少買一條裙。以前參加飲宴，我都要問人借裙着，家想自己擁有一條；以後唔打波，我一定會留長頭髮，好似南韓女仔好興嗰種又長又鬈嘅頭髮。
葉姵延（廣州亞運女單銅牌）
23歲的黑妹，9歲見李麗珊在96奧運站在頒獎台，那一刻開始想代表香港；中四畢業後轉打全職至今7年，累積亞運1銀1銅、東亞運1金，最大標誌是羽球球場上瞓身救球。