「一生總有第一次」，只是無諗過經手人會係胡慧冲。來到曼谷最新鮮滾熱辣的鬼屋主題商場Mansion7，有古怪士碌架、力士敲棺材玩，但我第一時間唔係入鬼屋撞鬼，係入性商店搞搞震。
記者、攝影：曾冠輝
鬼屋Shopping至2am
終於終於，曼谷終於有個啱晒大人細路、男男女女飯後夜遊的「夜場」。咪心邪！「夜」「場」者，開到好夜的商場也，平日開到午夜12點，周五六更至凌晨2時方休，仲夜過夜市。新商場字號：Mansion7，耗資約4千多萬港元打造，內設40間舖，集時裝、精品、娛樂、飲食於一身。跟曼谷任何一間大型商場都不能相提並論，甚至可稱之為曼谷唯一主題shoppingmall。Mansion7的設計概念是BoutiqueThrillerMall，簡單講就係鬼屋商場。「大宅」外牆古怪佈置再配上紫色燈光，嚇人得嚟仲幾有型。正門10幾米高一隻「幽冥鬼爪」非常詭異，遊客進場分明就是送羊入虎口。商場內燈光昏暗，佈滿亂石、枯樹、空凳等陰森元素，天花還懸掛一個巨大橙月，氣氛一流，十足置身怪誕城。中央位置是個大「Playground」，設不同古怪遊戲設備，如畸形士碌架枱、力士敲棺材、獎門人式橡筋纏身開寶箱……特別日子還會開P，正如剛過去的萬聖節便辦了一場盛大化裝舞會。
Playground三大鬼怪Game
Mansion7
地址：244/7RatchadapisekRoad,Huaykwang,Bangkok
網址： http://www.themansion7.com
曼谷人就為驚而來
係咁嘅，話說大宅是建築師Ombra送給老友LordRatchadaPiriyayota之作，Ratchada是位出了名好人的醫療軍官，可是第一次世界大戰後成為戰犯而受盡折磨，獲釋後性情大變。後來，獨生女更染上怪病，17歲便香消玉殞。漸漸大宅也就重門深鎖，只有建築師依然來探望。久而久之，街坊開始八卦，傳說聽見大宅傳出慘叫聲，Ratchada變成瘋狂博士，晚晚匿喺大宅做人體實驗，希望找出令女兒重生的辦法。而白老鼠都是從醫院捉來的病人，更有入無出。死者化成厲鬼，希望報仇。Ratchada也不是省油的燈，除了精通醫術，竟還會邪術，他使出黑魔法的七個咒語，將惡靈鎮壓在大宅內，可是還欠了一個重要元素：好人的眼睛。一晚建築師如常造訪，可是這次他再沒有步出……
驚？啱晒！不少曼谷人就是為驚而來，因Mansion7的重要構成其實是鬼屋，以上傳說正是鬼屋DarkMansion的背景故事。實地有幾驚？當然唔可以話你知，但以泰國鬼怪指數參考，驚嚇程度點都有番咁上下。咁故事孰真孰假？唔使講啦。
DarkMansion（鬼屋）
門票：每位約$47
衝入性商店 搵做愛廁紙
鬼屋以外勿忘重點：shopping呀！揀得「鬼屋」開舖的相信都非一般人物，是故商場內古怪店舖特別多。未入商場Roger已預先透露：「裏面有正嘢，全曼谷只此一家！」以為係咩，原來係sexshop。喺香港呢個「保守之都」總係怕尷尬連眼尾都唔敢望一眼，反觀曼谷，店員任影唔嬲，參觀者面無難色出出入入，這才是自由開放。此回終於可以名正言順，拉住Roger衫尾兼拎住相機直闖。店內一般震動系性玩具固然有，其他齋具玩味的諸如陽具蠟燭、做愛姿勢插圖廁紙等亦有。當中最欣賞是幾副boardgame、cardgame，玩者需按圖板或遊戲卡上指示做出性愛動作。無論與情人單挑，還是一班朋友群揪，都能盡興。
TheHiddenCloset
地址：GardenC05
索女老闆設計 暗黑高貴
Mansion7內不少是小本經營的自家設計。正如Greenwich，索女店主阿Mo以往從不涉足fashion，一天忽發奇想自己試試設計時裝，仲開埋舖頭創業做生意。以為佢玩玩吓，請阿Mo自己做model着上身影相，一睇先知設計一啲都唔差，風格帶點darkelegant，高貴得來有型，着去飲或蒲都無問題。阿Mo着得入型入格，完全是按自己style度身訂做，絕不是外間連鎖店式時裝的那回事。唯一可恨是店只設女裝……
Greenwich
地址：GardenB03
ThrillerMall
溫馨提示：
曼谷搭的士要留意，付款時司機很多時會訛稱無散紙希望你唔使佢找，所以記得袋定散紙以備不時之需。
TravelMemo
持BNO或特區護照免簽證。泰國領事館：25216481
阿聯酋航空前往曼谷機票$1,837起，
查詢： http://www.emirates.com
1港元約兌3.9泰銖（文中價錢已折算港元）
220V，兩扁腳插座
泰國
曼谷
下周有雷雨，26-34℃
