打擊樓市措施一浪接一浪，做到政府上氣唔接下氣，偶有失蹄真係唔出奇，好似金管局上星期五推出進一步收緊樓市措施嘅新聞稿咁，中、英文版本鬧雙胞胎，中文版本明明話800萬元或以下嘅住宅樓按貸款最高成數維持7成，但英文版就話800萬元樓下先係7成，800萬元就列入貸款最高成數係6成。
不過金管局呢個係小錯啫，基於金管局對於借800萬元按揭嘅貸款者設最高貸款額唔超過480萬元，即係就算你買800萬元嘅樓，借盡都係6成。呢啲手文之誤雖然唔會搞出啲乜嘢軒然大波，經求證後，英文版先啱嘅。香港點都係中國人社會，識睇中文嘅，點都多過識睇英文啩，啲嘢都係清楚啲好。