自認狗癡嘅MsMo毛孟靜，9月時出手救咗俾漁護署捉到嘅流浪狗「羅密歐」，羅密歐成功逃過人道毀滅。噚日再次出動，幫約80戶宇晴軒業主聲討屋苑嘅業主立案法團主席黎志良，黎逼約100戶養寵物嘅業主14日內搬走寵物，MsMo當面狂插法團主席趕盡殺絕，話公契同樣唔畀養寵物嘅泓景臺，法團主席都畀戶主申請養寵物，搞到主席口啞啞，戶主都拍爛手掌。
義務幫拖嘅MsMo話，收到業主投訴e-mail都睇到眼濕濕。業主Jason五年前貪宇晴軒可以養狗置入單位，冇做嘢嘅老婆Grace照顧狗仔，當正親生仔咁。點知法團唔接受養狗申請，10月尾出信通知14日內要搬走寵物。Grace收到消息好傷心，失眠兼夾要食藥抗抑鬱。Jason被迫賣樓救狗。
同西施狗相依為命13年、獨居嘅胡婆婆仲話，最初主席應承佢可以養狗，先選黎生做主席，點知有人過橋抽板。睇到咁感人嘅人狗情緣，主席話，如果業主有特殊情況可以再傾，凡事有商量喎。