陳志雲愛將、《美女廚房》嘅廚房妹「阿飯」孫慧雪，同舞台劇演員男友陳冠中拍拖大半年繼續愛得如膠似漆。前日馮仁昭就見到阿雪同男友喺銅鑼灣麥當奴開餐，一份餐兩個人食之餘，仲你餵我、我餵你，好鬼煙韌。
街邊揀頭飾
前日傍晚6點幾，阿雪同陳冠中去咗時代廣場嘅老麥撐枱腳，阿雪入到老麥搵位坐低，陳冠中就去買嘢食。佢哋夾埋食一個餐，胃口真係細。不過，所謂有情飲水飽，馮仁昭見佢兩個食薯條時，間唔中你餵我、我餵你，其間陳冠中一時攬住阿雪掃背，一時又同阿雪咬耳仔，sweet成咁，真係乜都唔使食就已經飽飽啦！
阿雪同男友喺老麥逗留15分鐘之後，就蹺住男友離開，跟住阿雪喺銅鑼灣街角間首飾舖揀頭飾，陳冠中仲幫女友揀埋一份，呢個咁體貼嘅男友認真唔話得。
噚日馮仁昭打電話畀阿雪，問佢幾時同男友拉埋天窗，佢話：「未咁快住，大家都想打好事業基礎先。」
祝福陳志雲
講到陳志雲復職，阿雪好戥志雲開心：「佢咁有才能，一定幫公司搞得更好，我冇佢電話，不過如果喺公司見到佢嘅話會恭喜佢，祝福佢冇事。」