正所謂長江後浪推前浪，大家唔好成日話啲80後唔生性，其實都有例外o架！好似上市唔夠一個月嘅奶粉股環球乳業（1007），行政總裁趙宇今年只得24歲，係公司創辦人兼主席趙傳文嘅公子。
可能投資者會擔心大少爺年紀輕輕，會唔會唔夠經驗做揸fit人。上個禮拜環乳請一班記者北上黑龍江睇牧場，華華同趙公子傾咗一陣，就發現趙公子似乎好熟公司，仲慣晒同投資界打交道㖭。
趙公子話自己4年前已經入公司幫手，佢好坦白咁講，話一開始係俾阿爸逼入公司，「後生仔邊有人想搞農業o架！」但做做吓又覺得發揮空間幾大喎！趙公子話將公司上市都係佢嘅主意㖭！佢未來主力負責同投資者、芬佬打交道，立志同股東搞好溝通，認真後生可畏。