中國人識李小龍，洋人識BruceLee，半唐番影壇新人王李治廷發夢都恨扮演武打巨星李小龍，機緣巧合下，年僅23歲的李治廷成功擊退逾千對手出線參演電影《李小龍》，俊朗外形加上他天生自信、甩繩馬騮過度活躍個性，與輕狂霸氣的李小龍同出一轍，不過李治廷可否憑老翻李小龍在影壇打出未來，就要拭目以待。 撰文：比華利
《李小龍》上映日期：11月25日
李治廷去年憑電影《歲月神偷》在第29屆香港電影金像獎封新人王，一鳴驚人，步上康莊的演藝直路，火速升呢成為主角，孭飛主演電影《李小龍》，搖身一變成為一代武打巨星李小龍，李治廷非常珍惜這個難能可貴的機會，曲終人未散，李治廷日前與同片的夢中情人謝婷婷接受訪問時，仍然李小龍上身，在樓梯表演徒手攀爬，一展敏捷身手。
「李小龍係華人驕傲」
與李小龍的外形和神態比照，不得不說身形高䠷的李治廷有幾分「龍味」，特別是他眉宇間流露的自信與輕狂，他也認同：「其實我拍緊《歲月神偷》嗰時，有收音師都話我似李小龍，估唔到佢開口中，我冇幾耐就接演咗《李小龍》呢部戲。」
李治廷能有機會扮演李小龍固然興奮，但背負的壓力也不輕，本周六（11月27日）是李小龍70歲冥壽，他的新片正好與龍迷集體回憶巨龍的光輝，他說：「邊個演員唔想有咁嘅機會去演李小龍，佢同一個靚仔好唔同，實在太難得，好老實講，我唱作人出身，家可以變身『武打巨星』，梗係開心。李小龍係華人嘅驕傲，全球有邊個人唔尊重佢。冇一個人會講李小龍任何負面嘢，無論亞洲，甚至歐美同世界各地，大家都會從心底發出對佢嘅一份敬重。」
「我留意佢嘅小動作」
這次《李》片着墨於交代李小龍的輕狂歲月，讓年僅23歲、同樣青春無敵的李治廷有不少發揮空間，他演得輕鬆，他把李小龍那份爆棚自信演得淋漓盡致，問到他會給自己表現多少分時，李治廷忽然收斂輕狂：「我講唔到幾多分，我注重過程，呢份享受已畀足我100分。」
為了重現小龍的風範，自問功夫有限的李治廷，他細心模仿李小龍的小動作和神韻以彌補不足，開戲前狂煲了偶像的《龍爭虎鬥》、《唐山大兄》和《猛龍過江》三部經典作品，他說：「我好留意佢嘅小動作，我又睇過佢接受外國媒體嘅訪問，佢表現出色、淡定，毫不怯場。」
李治廷在戲中武打戲份不算多，但尾段與挑釁他的老外在米倉的埋身戰，劇情交代李小龍最終把牙擦擦的老外打得落花流水，招牌李三腳成功退敵，李治廷直認這場戲令他過足戲癮：「呢場打戲係一個好好嘅經驗，我咁大個仔都未真正打過一場交，細細個跟同學推撞唔算數。」
「中拳嗰一嘢幾high」
始終不是打星出身，所以拍攝打戲令李治廷苦不堪言，他說：「我有中招呀，俾對手打中頭同臉，不過我唔怕痛，拍打戲係好吃力，但我好想同大家分享一下，中拳嗰一嘢，雖然有啲痛，但感覺幾high，幾過癮。」
演過李小龍，令李治廷對這位巨星了解更深，到底二人性格上有甚麼異同之處？李治廷說：「我諗自己紮紮跳冇時停最似佢，我試過9歲時貪玩，拉住晾衫繩玩，點知條繩太幼斷咗，我個頭倒插落石屎地，搞到流血入院，仲連嘔咗幾次，嚇親屋企人。我細細個就有過度活躍症，讀國際學校，我又講唔停嘴，成日要見家長，我自問係頑皮學生，不過慶幸學校同學都乖，所以從未試過打交。」
奀皮仔李治廷自幼身邊玩伴多，但卻從不像李小龍一樣以大佬自居，李治廷說：「李小龍喺兄弟前係大佬，好有霸氣，呢樣同我最唔似，因為我同自己嘅兄弟一齊，我就會變身一支膠水，好鍾意將大家黐住，我唔使做最突出嗰個。」那追女仔可是否也如李小龍一樣內斂兼細膽，他尷尬避談：「李小龍尊重女性，佢根本就天不怕地不怕。」