鎮守香港50年嘅商台，噚日四面楚歌，各黨派議員異口同聲討伐，認為政府唔應該再同商台續牌，要名嘴封咪、封殺異見嘅商台，終於有今日。
立法會資訊科技及廣播事務委員會噚日討論商台同新城牌照中期檢討問題，商台一姐陳靜嫻帶隊出席，多個民間團體同市民都有到場發表意見。以「大河蟹批發商會」名義到場嘅「鹵味男」錢偉洛率先開火，直斥商台自甘墮落，竟然收錢為民建聯塗脂抹粉，做《十八仝人愛落區》呢啲政治宣傳節目，既然商台並非人民喉舌，政府唔好再續牌。
民建聯劃清界線狠批
民建聯同商台勾結，不過陳鑑林發言時都十分唔客氣，佢先為《十八仝人愛落區》辯護，指節目唔係政治宣傳而係關心社區嘅高質素節目，話係咁講，陳鑑林都同商台劃清界線，個節目係商台提議做，唔係民建聯主動。之後口氣一轉，就狠批商台好多主持人有政治傾向，政見非常偏頗，只係請泛民做嘉賓開咪，視建制派、民建聯成員如無物，佢要求政府殺無赦，「要認真考慮係咪應該再續牌（畀商台）」。
土共同商台有段不共戴天歷史，嗰一段搞出人命嘅慘劇，八方都唔想再提，估唔到事隔幾十年，土共終於大報復，即使商台轉軚幫佢哋造勢，都不能擺平。陳鑑林狂踩商台，對超人旗下新城財經台卻讚不絕口，話成日收聽，覺得市道分析好精闢；不過樹仁大學教授梁天偉卻批評幾個電台啲財經節目一味講冧巴，卻好少提及炒股風險，如此信口開河講股市，可能害死好多人。
被民建聯指獲商台眷顧有加嘅泛民，對商台都冇留手，李永達同劉慧卿要求商台交代幾年前無故要名嘴封咪，甚至炒佢哋魷魚事件。李永達指其實商台咁做好鬼蠢，事關名嘴冇咗電台個地盤卻搖身一變成為議員，繼續鬧人仲過癮。商台總經理陳靜嫻面對質問，惜字如金，對封咪事件只係話「我冇嘢補充。」
名嘴做咗議員，點解又唔開聲鬧人呢？事關黃毓民係委員會主席，噚日首次主持會議，所以不能加入圍攻，對於封咪單嘢嘅內情，佢拋低一句話：「我知、商台知，共產黨都知。」
mailto:[email protected]